Miss Wales yn galw ar gymunedau ar draws Cymru i roi'r 'rhodd orau' i rywun y Nadolig hwn, ar ôl derbyn trallwysiadau gwaed sydd wedi achub ei bywyd.

Mae merch ifanc 22 oed o'r Barri yn annog pobl ar draws Cymru i ystyried rhoi gwaed, platennau a mêr esgyrn y Nadolig hwn. Cafodd enillydd Miss Wales, Darcey Corria, nifer o drallwysiadau gwaed ar ôl i ddamwain car difrifol ei gadael yn ymladd am ei bywyd.

Cafodd Darcey ei choroni’n Miss Wales ym mis Mai 2022, ond bu bron i'w llwyddiant ddod i ben yn drasig pan dorrodd ei phelfis, ei chefn, ei gên a’i gwddf yn dilyn damwain car ym mis Ionawr 2023 ar yr M4 ger Pen-y-bont ar Ogwr.

Featured image courtesy of Danielle Latimer.

Mae'r Gwasanaeth yn darparu cynnyrch gwaed a gwaed sy'n achub bywydau i 19 o ysbytai ar draws Cymru ac i bedair awyren Ambiwlans Awyr Cymru i'w defnyddio mewn argyfwng. Mae’r Gwasanaeth yn rheoli Cofrestr Rhoddwyr Mêr Esgyrn Cymru hefyd, sy'n recriwtio ac yn cefnogi gwirfoddolwyr mêr esgyrn sydd yn cael eu cydweddu â chleifion canser ar draws y byd i roi rhodd mêr esgyrn a allai achub bywydau.

Ar hyn o bryd, nid yw tri o bob deg claf sydd angen trawsblaniad mêr esgyrn yn dod o hyd i rywun sydd yn cydweddu â nhw, ac mae'r risg o beidio â dod o hyd i roddwr yn cynyddu i saith o bob deg ar gyfer cleifion o dreftadaeth lleiafrifoedd ethnig, oherwydd diffyg cynrychiolaeth ar gofrestri rhoddwyr byd-eang.

Dywedodd Alan Prosser, Cyfarwyddwr Gwasanaeth Gwaed Cymru: "I gleifion sydd angen gwaed, rhodd o waed fydd 'yr anrheg orau' maen nhw'n ei derbyn y Nadolig hwn."

Mae gan waed a chynnyrch gwaed, sydd eu hangen i gefnogi cleifion ac achub bywydau ar draws Cymru, fywyd silff fer, ac mae ysbytai eu hangen bob dydd, gan gynnwys yn ystod gwyliau banc fel Dydd Nadolig a Dydd Calan.

Gwnewch rywbeth anhygoel yn ystod y Nadolig a'r Flwyddyn Newydd eleni. Rhowch yr anrheg orau i rywun, rhowch waed ac, os ydych chi rhwng 17-30 oed, ymunwch â Chofrestr Rhoddwyr Mêr Esgyrn Cymru naill ai pan fyddwch yn rhoi gwaed neu drwy ofyn am becyn swab ar-lein.